#አንተ_አባቴ_አይደለህም"

      "#አንተ#አባቴ#አይደለህም”

ከገባሁበት የሃሣብ ባሕር የወጣሁት ኡስታዝ ሉቅማን ስለ አዕምሮ በሰጡን ተጨማሪ ትንታኔ ነበር። ኡስታዙ አዕምሮን ማዳበርና ከስሜት (emotion) በላይ እንዲውል ማሰልጠን ያለውን አስፈላጊነት አጽንኦት ሰጥተው ሲያስረዱን፡-

“#አዕምሮን #በአግባቡ #አለመጠቀም #ስሜታዊና #ችኩል #ውሳኔዎች #እንድንወስን #ያደርገናል። የዳበረ አዕምሮ ያላቸው ስኬታማ ሰዎች በሚደርስባቸው ውጫዊ ጫና እና እነርሱ ለጫናው በሚሰጡት ምላሽ መካከል የማገናዘቢያ ጊዜ አላቸው፤ ድንገተኛና ችኩል ምላሽ አይሰጡም፤ ስለተፈጠረው ነገር ሙሉ መረጃ ሳይኖራቸው ለፍርድ አይሮጡም፤ ለውሳኔ አይቸኩሉም። ውሳኔያቸው ከዕውቀት እንጂ ከስሜት አይመነጭም። በስሜት ግፊት የተወሰነ ውሳኔ በአብዛኛው ከፍተኛ ጥፋት ያስከትላልና።” አሉ። ኡስታዙ ንግግራቸውን ቀጠሉ፡

ከረጅም ጊዜ በፊት በአንድ የቴሌቪዥን ፕሮግራም ላይ ንግግር ያደረጉ ምሁር ያቀረቡት አንድ አሳዛኝ ታሪክ ከላይ ያነሳሁላችሁን ሃሳብ ይበልጥ ግልፅ የሚያደርገው ይመስለኛል” አሉና ወደኛ ተመለከቱ።

የዛሬውን ውይይትም በዚሁ ታሪክ እናሳርግ" አሉ የዕለቱን ፕሮግራም ለማገባደድ በማሰብ። ታሪኩን ለመስማት ያለንን ጉጉት ከሁኔታችን ተረድተዋል። ኡስታዙ ታሪኩን እንዲህ ሲሉ አወጉን፡-

“ሰውየው ወደ ወህኒ ቤት የወረደው በጣም የምትወደውንና የሚወዳትን የትዳር አጋሩን ከአንድ ዓመት ሕፃን ልጁ ጋር በመተው ነበር። የአራት ዓመታት ጽኑ እሥራት ፍርደኛ ነው። እነኝህ ዓመታት ለባለቤቱ ፈታኝ ነበሩ። ቢሆንም በምትችለው አቅም ሁሉ የምታደርገውን እንክብካቤ አልቀነሰችም። ውድ ባለቤቷ ከእስሩ በላይ ሌላ ጭንቀት እንዳይፈጠርበት የአቅሟን ያህል ጥራለች። ምግብና ልብስ በማመላለስ ለባለቤቷ ያላትን አጋርነት አሳይታዋለች፣ የተሰበረ ሞራሉን ጠግናለታለች።

ባለቤቱ ሰውየው በታሰረበት የመጀመሪያ ዓመት ሕፃን ልጁን ወህኒ ቤት እያመጣች ታሳየው ነበር። በቀጣይ ዓመታት ግን መኖሪያ ቤታቸው ከወህኒ ቤቱ ርቆ

የሚገኝ በመሆኑ በየጊዜው ማመላለስ አልቻለችም ነበር። አባት ልጁን በየጊዜው ማግኘት ቢፈልግም ባለቤቱ ያለችበትን ሁኔታ በመገንዘቡ ብዙ አልተከፋም።

የባል ከእስር መፈቻ ዕለት ደርሷል። ሚስት በደስታ ተውጣ ወደ ወህኒ ቤት አመራች። ባሏን በፍቅርና በናፍቆት አቅፋ ሳመችው።

አልሐምዱ ሊላህ -እንኳን አላህ ለዚህ አበቃን ትላለች እንባ እየተናነቃት።

እርሱም ደጋግሞ አላህን ያመሰግናል። ቤቱ ደርሶ ልጁን እስኪያገኝ ቸኩሏል። ቤታቸው ደረሱ። መኖሪያ ቤታቸው የጋራ መኖሪያ ሕንፃ ውስጥ አራተኛ ፎቅ ላይ ነበር። ቤቱን ባለቤቱ በሚገባ አሰናድታ እንደጠበቀችው ሲያስተውል ደስታው ጨመረ። የናፈቀውን ልጁን አቅፎ እየሳመ የደስታ እንባው ኩልል አለ።

አባት ልጁን ጭኑ ላይ አስቀምጦ አገላብጦ ይስመዋል። ናፍቆቱ በቀላሉ የሚወጣለት አይመስልም፤ አሁንም አሁንም ልጁን ይስመዋል። ልጁ ግን የተለዬ ነገር አይታይበትም። አባት የአምስት ዓመት ሕፃን ልጁን፡

· እኔ'ኮ አባትህ ነኝ " ይለዋል - ዓይን ዓይኑን እየተመለከተ።

ሕፃኑ ፊቱን ቅጭም አደረገና፡- " አንተ አባቴ አይደለህም። የኔ አባት ማሚዬ ማታ ማታ አቅፋው የምትተኛው ሰውዬ ነው " ሲል ይመልስለታል።

አባት የሰማውን ማመን አልቻለም፤ ቀዝቃዛ ላብ በጀርባው ሲንቆረቆር ተሰማው ሰውነቱ በድን ሆነበት፤ ድንጋጤው ምላሱን አሳሰረው፤ የሚወዳት ባለቤቱ የፈፀመችበትን ከህደት መቋቋም ተሳነው፣ ከእስር በመፈታቱ የተሰማው ደስታ በንኖ ሲጠፋ ተሰማው። ይህ ሁሉ ሲሆን ባለቤቱ እርሱን ለመቀበል ያዘጋጀችውን ምግብ ለማቀራረብ ጓዳ ውስጥ ተፍ ተፍ በማለት ላይ ነበረች። የሰውየው ቁጣና እልህ ገደቡን ጥሶ ሊፈስ ተቃርቧል። የሚያደርገውን አጥቶ ይንቆራጠጣል። ሚስት ምግብ ይዛ ወደ ሳሎን ተመለሰች። ምግቡን ጠረጴዛ ላይ እያስቀመጠች፡

የኔ ፍቅር አልሐምዱሊላህ : እንኳንም ተፈታህልኝ። የመጀመሪያ ፕሮግራማችን ዑምራ መሄድ ነው አይደል?' አለችው፡፡

ይሄኔ ባል ንዴቱ ይበልጥ ጨመረ፤ ሌላ የማስመሰል ሴራ ለማስተናገድ አልፈቀደም።

እንቺ አስመሳይ! ደግሞ ዑምራ እንሂድ ትይኛለሽ? ' አንባረቀባት።

በባሏ የባህሪ መቀያየር ግራ የተጋባችው ሚስት በድንጋጤ ድርቅ ብላ ቀረች። ልታረጋጋው እየሞከረች፡-

#ምነው #የኔ #ፍቅር?  አለች። * #የኔ #ፍቅር #አትበይኝ! !

የሰውየው ቁጣ እየናረ ሄደ። ከመቀመጫውው ተፈናጥሮ ተነሳ። ዓይኑን አፍጥጦ ተጠጋት። ሸሸችው። አሁንም ተጠጋት። ከቤት ወጥታ በረንዳ ጫፍ ላይ ቆመች። በከፍተኛ የስሜት ነውጥ ውስጥ ያለው ባል ምን ዓይነት እርምጃ መውሰድ እንዳለበት ኢያውቅም፤ አዕምሮው በስሜቱ ተሸፍኗል። በፍርሃት እየተርበደበደች ያለችውን ሚስቱን ቁልቁል ወደ ደረጃው በኃይል ገፈተራት። ሚዛኗን ስታ ወደቀች። በደረጃዎቹ ላይ ተንከባለለች። አሳዛኝ ሲቃ አሰምታ ራሷን ሳተች።

በንዴት ያበደው አባት የልጁን እናት አወዳደቅ እንኳ የሚያስተውልበት ጊዜ አላገኘም። በፍጥነት ወደ ሳሎን ቤት ተመለሰ። ሕፃን ልጁ ከፊት ለፊቱ ቆሟል። እናቱ ላይ የተፈጸመውን የማያውቀው ሕፃን በእጁ አንድ ነገር ይዟል።

" አባቴ ይሄ ሰውዬ ነው። ማሚዬ ማታ ማታ እቅፍ አድርጋው የምትተኛው አባቴ ይሄ ነው " አለ የአባቱን ፎቶ እያሳየው።

አባት ብርክ ያዘው፤ ፎቶው የርሱ የራሱ ነበር። ገፍትሮ ወደጣላት ባለቤቱ ተንደረደረ። መንደርደሩ ምን ሊፈይደው ሚስት ራሷን ስታ ተዘርርራለች፣ በፍጥነት ወደ ሆስፒታል ይዟት ነጎደ። ሕይወቷ ባያልፍም ሙሉ አካሏ ሽባ መሆኑን ሀኪሞች አረጋግጡ

ኡስታዝ ሉቅማን ትረካቸውን በሐዘን ተውጠው ቋጩ። ይህ ልባችንን የነካ አሳዛኝ ታሪክ ከየትኛውም ውሳኔ በፊት አዕምሯችንን ማሰራት እንዳለብን እስተማረን፣ ከስሜት በላይ ያልሆነ፣ ያልዳበረና ያልተረጋጋ ውሳኔ ምን ያህል አደጋ እንደሚያስከትል አስገነዘበን። ኡስታዙ

በሉ ልጆቼ፡ ለዛሬ እዚህ ላይ እናብቃ፡፡ ኢንሻአላህ በሚቀጥለው ሳምንት በዚሁ ሰዓት አንገናኛለን አሉና ዱዓእ አድርገውልን ፕሮግራሙን አጠናቀቁ።